A proposta que agora plantexo non é nova, pois xa existe
noutros lugares do estado español, pero e que aquí a Xunta segue empecinada en
facer de Galicia un grande polígono industrial baleiro e vendernos, aínda por
riba, que é necesario facer sitio a unha industria pantasma ou fenecida. O
único sector vivo que queda por estes pagos é o sector servicios. Pois,
daquela, démoslle cabida e facilidades ós locais de concertos poligoneros,
cuxos altofalantes non nos van despertar do noso longo sono.
De feito, os prezos
xa lles conveñen moito mais que no centro urbán, onde vai parar: por exemplo,
alugar unha nave en O Ceao costa de media 2 euros por metro cadrado, é dicir,
se ten 500 m
o arrendatario terá que desembolsar mil euros mensuais. I ese custo pódese
abaratar nun 25% no caso de grandes locais. Nada que ver, por tanto, cos 3 ou 4
euros que poden costar o aluguer no núcleo urbán lucense _xa non falemos de
outras cidades galegas coma Coruña ou Vigo.
Por outra banda, as licenzas que regulan o asentamento das
discotecas e salas de concertos nos polígonos han de ser favorecedoras e
claras. Se os locais acaban por seren ilegais como sucede en Femades, Cornellà
de Llobregat, onde só poden instalarse espacios de ocio para os traballadores
dos polígonos, e van e lles plantan alí tres macro discotecas sen regulación,
pois os veciños protestan con razón.
Do que se trata é de evitar os conflitos por ruído entre
negocios e moradores, como sucede a cotío nos centros urbáns; habilitarlles ós
polígonos un bo sistema de transporte colectivo que xa adoitan ter para as
horas do día por semana ou ou ampliarlles o horario –co conseguinte incremento
de postos de traballo dos conductores da compañía de autobuses, e da reducción
de fill@s mortos por accidente_; e tamén puxar polas novas bandas de música
galega, que rematan esmorecidas ou ignotas entre tanta chunda-chunda de
importación que fan ultramonótona a movida das nosas cidades. Pero ben, para
gostos, os que queiran seguir co chunda, pois á súa nave correspondente.
Nos polígonos queda sitio para moita festa e moito negocio:
nada menos que 54 millóns de m2 de superficie industrial en Galicia, da que
mais de 6 millóns está dispoñible agora mesmo. E aínda nos quere vender o
goberno de Feijoo que precisamos 45 millóns de metros mais ata o 2024? Vaiamos
con calma.
Pero aínda uns razoamentos mais, o dos polígonos é todo un
fenómeno socioprofisional que non podemos deixar á marxe. E vallan estas
pequenos apontamentos que siguen como sintético estudo de mercado do que xeran
ou poden xerar estes novos espazos no extrarradio das cidades do século XXI. As
primeiras que decidiron levar a súa mercaduría cara eles foron as emprendedoras
do oficio disque mais vello do mundo, si, as putas. De feito, a verba
“poligonera” _aínque que non figure aínda no DRAE_ veu primeiro a significar _antes
que a frecuentadora de discotecas instaladas nos polígonos_ a prostituta que,
deixando de facer a rúa, deu en facer o polígono en busca dos posibles clientes
que saen de traballar con cartos frescos e ideas tristes das industrias. E
detrás delas, claro, viñeron outros grandes rastreadores de negocio, alí onde
os haxa: os chineses. Só por poñer tres exemplos dos moitos que hai, o famoso
Chino Antonio de O Ceao, mais os Merkasia do Espíritu Santo e da Grela en A
Coruña atraen a todos os veciños do entorno, aínda que que haxa que coller o
coche para ir ex profeso visitalos. Que nos importa, si facer quilómetros para
ir mercar e festear é algo inherente á nosa idiosincrasia de feirantes galegos…
Así que, unha vez posta a pica polos chineses, nos polígonos
quedan aínda moitas posibilidades sen explotar. Pénsese, por exemplo, nas
garderías que farían falta para coidar ós fillos dos traballadores, ou nos
supermercados que, cun horario flexible, poderían abastecer as casas destes
mesmos curritos cando saen do choio; e, por suposto, nos restaurantes e
cafeterías que poderían vivir dos turnos laborais. Moitos xa o fan, eso si,
tendo que asumir unha metamorfose kafkiana ó mediodía. Eu mesma traballei de
mañá nun negocio de hostelería do polígono de Pocomaco en A Coruña, poñendo
moreas de almorzos e cafés, enfundada nos habituais pantalón negro mais camisa
branca; pero, ai, cando chegaba o serán e con el as rapazas do seguinte turno
cambiaban as tornas. Nada de pelos recollidos nin austeras blusas de traballo,
aquelo transformábase directamente nun pub ás cinco da tarde, con exóticas
camareiras inmigrantes tras da barra, aderezadas con escotes xenerosos,
ombligos con piercings ó aire, cabelos peiteados á moda, e suxerentes conversas
cos clientes marioritariamente masculinos cubata va cubata viene.
A vida tira da economía. Só hai que estar atentos.
No hay comentarios:
Publicar un comentario